Sommarles: Blei fjerde best i heile landet

Sommarles.no er ein digital lesekampanje i regi av folkebiblioteka for alle barn i 1.-7.klasse. Målet er å få flest mogeleg til å lesa mest mogeleg i løpet av sommarferien, og under lesekampanjen som starta 1. juni og blei avslutta 31. august, deltok 125.000 barn frå heile Noreg. Totalt blei det lese over 1,5 millionar bøker og delt ut over 136.000 premiar.

Både i Etne og Vindafjord har leselysta vore på topp. I Vindafjord kommune deltok 314 elevar og i Etne kommune melde 81 prosent av elevane seg på lesekampanjen. Gjennomsnittleg deltaking låg på 27,9 prosent på landsbasis.

— Det deltok 296 elevar i år. Dei las til saman 4.598 bøker og heile 420.522 sider. Det gav fjerde plass i oppslutnad i heile landet, seier bibliotekar Ingeborg Sørheim ved biblioteket i Etne og er mektig imponert over den flotte innsatsen.