Slik blir turfavoritten til: 2700 tonn påskestemning
Då Kvikk Lunsj kom i 1937, vart han raskt ein turfavoritt. I dag blir sjokoladen like gjerne innteke utan ski på beina. Somme et han til og med til frukost – kvar dag.
Påskesol, musikken til fjellvitreglane i bakgrunnen. Nærbilete av ei hand på veg ned i brystlomma på anorakken. Nytt klipp, av handa med ei plate raude, grøne og gule striper. Øva fingrar flerrar opp den langsgåande plastskøyten. Klipp til påskesola, zoom inn på sjokoladeplata: Fire blanke, brune stavar med avtrykk av ein afrikansk stork. Eit ørlite knekk, og så, medan musikken blir høgare; nærbilete av munn, og av tenner som treff sjokoladen.
Knas.
Kort glimt av tverrsnitt med kjeks og sjokolade, før munnen – og auga med solbrilleskilje – lukkar seg.
