Seier ja til fleire flyktningar

Kommunestyret i Vindafjord kommune har tidlegare vedtatt å busetja minst 10 personar i 2022, men etter Russland sitt angrep på Ukraina er talet på flyktningar venta å stiga kraftig i heile Europa. Det aukar behovet for hjelp også her til lands og så langt er det meldt at rundt 40.000 flyktningar kan bli busett i Noreg i løpet av året. Det betyr at kommunane må vera førebudd på auka oppmoding frå Utlendingsdirektoratet om busetting i tida som kjem.

Tysdag var flyktningsituasjonen tema under kommunestyremøtet i Vindafjord kommune og eit samla kommunestyre gjekk inn for i første omgang å busetja 55 flyktningar som kommunen så langt har blitt bedne om å busetje. Dette inkluderer 18 flyktningar som alt er komne til kommunen og som er innlosjert i private heimar.

Kommunestyret sa også ja til å gje kommunedirektøren fullmakt til å setja av integreringstilskot på fond og disponere dette til å retta nødvendige ressursar til mottak av flyktningar frå Ukraina.