Sauebøndene kritiske
Sauebønder i Etne er oppgitte over fleirtalet i Hordaland fylkesting som i ei fråsegn gjev grønt lys for etablering av eit gaupekull i fylket.
Det var i fylkestinget sist veke at Arbeidarpartiet, Miljøpartiet dei grøne, Sosialistisk Venstreparti, Raudt og Venstre sikra fleirtal med 30 av 55 røyster for ei fråsegn kor fylkestinget ber myndigheitene opna for å etablere eit gaupekull i Hordaland. Fråsegna skal sendast til statsråd, departement og hordalandsbenken på Stortinget.
Stordabuen Geir Angelstveit (V) var forslagsstillar. I fråsegna heiter det at Hordaland fylkesting meiner det er urovekkjande at Noreg har ei rovdyrforvaltning som tillét jakt på raudlista dyr, og at det bør opnast for å etablere gaupekull i fylket og at rovviltnemnda bør tillate streifdyr å ferdast i fylket. Dette uavhengig av bestandsmåla på gaupekull.
I mars i år vart det skoten ei gaupe på Voss. Fylkestinget viser til at denne gaupa, så langt ein veit, ikkje har skada husdyr og at ho difor berre vart skoten fordi ho var på feil plass til feil tid. Fylkeskommunen meiner det er urovekkjande at ein har ei rovdyrforvaltning som tillét jakt på eit dyr som er raudlista.
