Berni Øyjord og Øyvind Thorson er styremedlem i Sæbøvikjo burettslag og er svært glade for at dei har vunne den store utemiljøkonkurransen for 2025. Det betyr 20.000 kroner til utbetaling, og det skal gå til bord og stolar til paviljongane bak dei - det gode samlingspunktet i burettslaget.
Grethe Hopland Ravn
Sæbøvikjo vann utemiljøpris
Sæbøvikjo burettslag i Etne har vunne Vestbo sin utemiljøkonkurranse for 2025. Juryen løfta fram korleis burettslaget har utvikla uteområdet som ein levande møteplass, der både fellesskap, trivsel og inkluderande nærmiljø står i sentrum.
Same dag som innbyggjarane i Sæbøvikjo burettslag
samla seg for å tenna årets julegran, kom gladmeldinga om at burettslaget dei
bur i hadde kapra førsteplassen i konkurransen om det beste utemiljøet i 2025.
Snakk om gladmelding.
— Det var sjølvsagt ekstra kjekt å kunna dela ei
slik gladmelding til burettslaget vårt, når me var samla. Premien var på 20.000
kroner, seier styreleiar i burettslaget, Øyvind Thorson glad.
Tidlegare i år inviterte Vestbo alle
bustadselskapa sine til å delta i konkurransen om å ha det beste bumiljøet. Vestbo er eit av dei store
bustadbyggjelaga på Vestlandet, og har medlemmar og burettslag i fleire
kommunar, blant anna Bergen, Øygarden, Etne og Haugalandet. Dei
stilte spørsmål som: Korleis ser eit godt bumiljø ut? Er det leikande barn i
trygge omgjevnader, benker fulle av naboar som slår av ein prat – eller ein
felleshage der grøne fingrar møtest på tvers av generasjonar?
