Rekordomsetnad i jubileumsår
Han søkte ein jobb han eigentleg ikkje kunne. Nå har Jan Lysne (59) frå Etne lagt bak seg 25 år i butikkbransjen og kan avslutta jubileumsåret med rekordomsetnad.
Året er 2000. Det første kjøpesenteret i Etne er under
planlegging og i huset der det tidlegare blei foredla mjølk er det nå planar om
butikkdrift. Ein matbutikk vil vera ein naturleg del av butikktilbodet, og
snart blir det klart at daglegvarekjeden REMA 1000 er rett kandidat. Den nye
REMA-butikken skal drivast som franchise og jakta etter ein franchisetakar blir
sett i gang. I Etne set ein kar som i mange år har jobba i trykkeribransjen i
nabobygda Ølen, og nå ser han sjansen til å prøva nye utfordringar.
— Eg
såg i Grannar at dei skulle etablera butikk i Etne. Eg søkte på ein jobb eg i
utgangspunktet ikkje kunne, men eg tenkte at det skulle eg få til, seier Jan
Lysne og smiler.
Den 23. november 2000 var alt klart og Meieriplassen
kjøpesenter kunne opna dørene. I førarsetet på den nye REMA-butikken sat den
tidlegare trykkerimedarbeidaren frå Etne, og saman med seks andre
butikkmedarbeidarar skulle han driva ein butikk som oppfylte kjedeeigaren sine harde
økonomiske krav.
