Rekordmange nyttar apoteket

— Vaksineringa har auka. Det har vore travelt. Me har hatt alle aldersgrupper innom, men dei fleste er over 60 år. Både menn og kvinner har kome for å vaksinera seg, seier apoteker Lene Røglestad ved Vitusapotek Etne.

Dei siste vekene har rekordmange dosar influensavaksine blitt sett ved apoteket. Etterspurnaden tok heilt av etter at media sette søkjelys på årets influensasesong og lufta påstander om ei mogleg hardare utgåve av infeksjonssjukdomen denne sesongen.

Kundane som ønskjer å få sett ein vaksinedosen på apotek kan enten ta kontakt direkte med apoteket eller bestilla gjennom appen Helseboka.

— Folk nyttar seg av Helseboka, men mange stikk berre innom. Folk likar at dei kan koma når dei vil, seier Lene.

Auke i nabokommunen

Dei to apoteka i Ølen merkar også auka etterspurnad etter influensavaksine denne sesongen. Det nystarta Ølen Apotek i Ølen Senter har hatt kundar innom nesten kvar einaste dag den siste tida, og har i tillegg sett over 100 bedriftsvaksiner.

— Mange synes det er greitt å bruka tilbodet på apoteket. Kundane er i alle aldrar, men dei fleste er over 60 år, seier apotekar Cathrine Lilleheil Christiansen.

Ved apoteket på Ølen Torg er situasjonen den same.

— Me har hatt litt auke kvart år særleg etter koronapandemien, og i år har me ein auke samanlikna med fjoråret. Me starta vaksinering første oktober og dei siste 3 til 4 vekene har me hatt mange innom, seier apotekar Emilie Prytz Hammarquist ved Apotek 1 Ølen.

Auke på landsbasis

Tal frå Apotekforeningen viser at 25 prosent fleire influensavaksiner er sett i apotek i år. Så langt er det sett 260.000 vaksinedosar mot influensa i apotek, noko som er meir enn 50.000 fleire enn på same tid i fjor.

— Me merka det særleg sist veke, og det gjeld for heile landet, seier kommunikasjonssjef i Apotekforeningen Jostein Soldal.

Årsaka til at stadig fleire vel å vaksinera seg for influensa i apotek er samansett. Influensasesongen kom tidleg dette året og årets influensa er venta å vera kraftigare enn på lenge. Halvparten av alle som vaksinerer seg i apotek er over 65 år, og sist veke sende Folkehelseinstituttet ut påminningsvarsel til personar i denne aldersgruppa med råd om å la seg vaksinere. Dessutan meiner Soldal auka tilgang i apotek har ført til at fleire vaksinerer seg.

— Fleire oppdagar at det er ei enkel moglegheit å ta vaksine i apotek og at ein nå kan få sett influensavaksine i apotek utan resept, seier Soldal.

Sist veke var det ein del apotek her til lands som gjekk tom for vaksine grunna leveringsvanskar. Men nå ser problemet ut til å vera løyst.

— Det blir påfyll igjen i løpet av denne veka, seier han.