Rein teaterglede med Kardemomme by
Sandeid barne- og ungdomsteater drog publikum rett inn i Kardemomme by-universet då dei hadde premiere laurdag. Med sterke prestasjonar, kreative kulissar og ein sal full av forventningsfulle publikummarar, blei framsyninga ei fargerik kulturbombe.
Publisert
Sist oppdatert
Sandeid barne- og ungdomsteater drog fullt hus laurdag, då dei opna dørene for publikum, og slapp dei inn i den fargerike, og alltid like fengande verdsbyen Kardemomme by. Og for ein premiere det blei! Her var det latter, song, brøl, brann, røveri – og eit sal som klappa med krumspringa på scenen.
Den velkjende historia om Kasper, Jesper og Jonathan er slett ikkje ny for publikum, men Sandeid-gjengen klarte å gi forteljinga både nytt liv og ny gnist. Med heile 28 barn på scenen, frå både Ølensvåg, Ølen, Bjoa, Imsland, Vikedal og Sandeid, blei det liv og leven frå første replikk. Aldersspennet var imponerande: frå dei yngste som knapt har rokke å læra multiplikasjonstabellen, til ein vaksen på 67 år som kasta seg inn i rolla som Kaptein Sorte Bill. Og publikum koste seg.
Annonse
Stortalent i uniform og røvarbukser
Fleire av skodespelarane utmerkte seg. Blant anna Lea Ness som spelte Politimester Bastian med ein stødigheit og ein sjarm som gjorde at publikum nærast håpa på å bli arrestert. Una Espeland Grønstad tok rolla som Tante Sofie og leverte henne med den rette miksen av streng moral, fargerik personlegdom og eit blikk som kunne få sjølvaste Kasper til å åtvara seg sjølv.
Fleire andre unge skodespelarar imponerte også med både song, spel og fantastisk innleving i rollene sine, og hadde publikummet med seg frå første augeblikk. Handlinga rulla ut slik me kjenner henne frå før: røvartokt i bakeriet og slakteriet, tante Sofie som blir røva frå heimen sin for å vera hushjelp for dei late og skitne røvarane, men som set seg skikkeleg respekt hos røvarane. Så mykje at dei leverer ho tilbake til huset dei røva henne frå. Så blir røvarane ferska på ny røvartokt i bakeriet, dei får fengsel, men då det plutseleg bryt ut brann i Tobias sitt tårn samlar Kasper, Jesper og Jonathan seg og viser kva dei eigentleg er laga av. Dei klarar å sløkke heile brannen, og endar opp som heltar. Kasper blir brannmeister, Jesper blir sirkusdirektør og får sitt eige sirkus, og Jonathan får oppfylt draumen sin om å bli bakar. Kardemomme by landar trygt.
Kulissar, kostyme og knallgod stemning
Annonse
Det er ingen tvil om at Sandeid barne- og ungdomsteater veit kva dei driv med. Kulissane var forseggjort, sminke og kostyme var profesjonelle, og organiseringa av framsyninga imponerte. Og det beste av alt: Det såg ut til at aktørane på scenen storkoste seg.
Etter framsyninga hagla superlativa frå dei som tok ordet. Anne-Kesia Eide Fatland frå Vindafjord kommune roste innsatsen og påpeikte den imponerande totalpakken teateret leverte. Gro Annette Espevoll frå Vikedal barneteater var tydeleg imponert. Ho var heilt overvelda over kor høgt Sandeid legg lista, og understreka at barna som er med, får noko dei kjem til å bera med seg resten av livet.
— Dette kjem de aldri til å gløyma, men hugsa for alltid, sa ho.
[caption id="attachment_204264" align="alignnone" width="780"] Her blir Kasper (Johanne Berge), Jesper (Lilly Vestbø) og Jonathan (Peder Thorsen) fanga etter at dei har røva hos bakaren.Bakar: Alma Håheim. Pølsemaker: Othelia Rørheim. Kjøpmann Berg: Johanna Sørvik Steinnes.Foto: Grethe Hopland Ravn[/caption]
Teatersjef med stålro
Primus motor Jostein Apeland fekk ein heilt spesiell takk frå scena. Han har vore ei berande kraft i Sandeid barne- og ungdomsteater i ei årrekke. Då han blei spurt om korleis kvilepulsen var, rett før teppefall, svarte han roleg:
Annonse
— Eg må seie at kvilepulsen er relativt låg.
Fullt hus – og meir i vente
Premieren laurdag var den første førestillinga av i alt fire. Laurdag skulle dei framføra Kardemomme by to gonger, og søndag stod ny framføring på plakaten på nytt. Onsdag neste veke er siste sjans til å sjå dei flinke skodespelarane frå Sandeid på scenen.
