På topp i hopp for hjarta
Å hoppa tau er både morosamt og sosialt, og når Nasjonalforeningen for folkehelse arrangerer hoppekonkurranse på landsbasis blir mange med. Også elevar frå Skånevik, som presterte svært godt.
Fjerde- og femteklassingane ved Skånevik skule bokstaveleg hoppa i det» då konkurransen Hopp for hjarta blei lansert i vår. I løpet av eit par skuleveker hoppa elevane tau så snart sjansen baud seg. Elevane hoppa i gjennomsnitt 60 minutt kvar dag, og det viser igjen på tabellen. I heile Hordaland er det berre sju klassar som har prestert så godt, og to av klassane er å finna i Skånevik.
— Slike gode prestasjonar ønskjer me sjølvsagt å markera, og derfor har me gitt tusen kroner til kvar klasse for innsatsen, seier Sigrid Olaug Sævareid som er leiar i Skånevik helselag.
Saman med Anne Gislaug Matre og Mary Taraldsøy som også representerer helselaget, kom dei denne veka til Skånevik skule for å dela ut diplomar til elevane i fjerde og femte klasse.
