Bildeserie
Opning av tidsmessig politistasjon
Politiet får rundt 140 fleire kvadratmeter å boltra seg på, fordelt over fire etasjar. Stasjonssjef Fredrik Alvestad ved Etne og Vindafjord politistasjon uttrykte glede for dei tilsette, og var raus med takk til leverandørane for ombygginga.
Det er same adresse i Ølen, og inngangsdøra er berre flytta nokre meter. Det er eit heilt anna inntrykk ein likevel får når ein går inn på stasjonen, kor det er eit tydeleg skilje mellom passhandsaminga og polititenesta i eit stort inngangsparti.
Politimeisteren i Sør-Vest politidistrikt med base i Stavanger, Hans Vik, klypte snora som var eit sperreband som blir brukt på åstader. Det var dei to politibetjentane Frida Krog og Steinar Stuhaug frå stasjonen i Ølen, som assisterte politimeisteren ved snorklyppinga.
Annonse
Identitet
Hans Vik var i talen sin tydeleg på at stasjonen i Ølen no er tidsmessig og gjenkjenneleg slik politistasjonene i landet skal vera.
— Det ser likt ut overalt, og her skal alle bli behandla likt, sa Vik i talen sin til dei rundt femti tilsette og inviterte gjestane.
Vik har innan ei veke nyopna politilokala i Sauda, og dessutan på flyplassen på Sola. Han delte ut tre store blomebukettar, og ved den som byggeigar Per Henriksen fekk, uttrykte han ei spøkefull orsaking for dei stringente krava politiet stiller til omgjevnadane sine. Han meinte at Henriksen Eigendom AS hadde utvist stort tålmod. Eigedomsselskapet er eigd 60 prosent av Gunbjørg Henriksen, som òg var til stades, og sonen Per Henriksen med det resterande.
Annonse
Den neste som fekk bukett var eigedomsansvarleg Allison Grimstad i Sør- Vest politidistrikt, som har administrert utbygginga.
Den siste buketten sa Vik at fleire skulle hatt, nemleg alle dei som har utført arbeidet med dei nye lokala som verkeleg ser ut som det skulle vera eit nybygg. Fine fargar, flott utført arbeid og fine løysingar. Vik hadde spurt stasjonssjef Fredrik Alvestad om dei kunne peika ut ein spesiell person som hadde gjort ein ekstra stor innsats, og då fall valet på Thomas Rødde frå Helgevold Gruppen.
Det var elles folk å sjå frå mange lokale handverkarar og leverandørar, som til dømes som nevnte Helgevold, Hervik Rør og malar Kjell Stensland.
To år
Det er to år sidan arbeidet byrja med omlegginga til ny stasjon.
— På det verste sat me alle i eitt og same rom, rett nok det store møtelokalet, seier Fredrik Alvestad.
Annonse
Politibetjent Frida Krog og administrativt tilsett Ranveig Lærdal Mattingsdal var begge einige om at det hadde gått fint i dei to åra, trass mykje endringar og støy.
Alvestad påpeika i sin tale at det som er markante betringar med dei nye lokala er betre ivaretaking av personvernet, lyd og IKT, brannvern og trykkleik, samt kvalitet og brukaromsyn.
Dei tilsette kan bruka treningsrommet i kjellaretasjen som har eigen inngang.
— Me kan bruka det i fritida vår, og det er det me kjem til å gjera utover den timen me tilsette har kvar veke for trening, seier politioverbetjent Inge Hårajuvet, som viste folk rundt over dei fire etasjane.
Det som kanskje for dei fleste var overraskande er at den nye» stasjonen ikkje har arrest. Det nyvunne arealet er framfor alt fjerde etasjen kor Henriksen Eigendom AS tidlegare leigde ut leilegheiter.
