Kari Vik Stuhaug ser fram til drop-in dåp.
Arkivfoto: Arne Frøkedal
Opnar kyrkjene – ber om påmelding
Medan Etne-kyrkja er stengt julaftan, vil det bli opne kyrkjedører og juleevangeliet i Vindafjord. — Ein krevjande situasjon, men me prøver, seier sokneprest i Ølen og Bjoa, Kari Vik Stuhaug
Koronapandemien har gjort det vanskeleg å ha ordinær drift ved kyrkjene. I Vindafjord har det ikkje vore gudsteneste sidan 8. november på Bjoa. Men i jula blir opne gudshus, men med påmelding.
— Kyrkja i Vindafjord ønskjer å gi eit tilbod om jul i kyrkjene til alle som ønskjer det. Til dei fysiske gudstenestene, som det vil vera seks av på julaftan, er det lagt til rette for påmelding på nett, opplyser Kari Vik Stuhaug.
Påmeldinga opnar i dag, torsdag kl. 17 og blir lukka 21. des. Dette gjeld kyrkjene i Sandeid, Vikedal, Imsland, Ølen (to gudstenester), Bjoa.
