Leiar Ståle Hustoft i Rogaland Bondelag (t.v.) og matgründer Finn Lothe har tru på den nye lokalmatsatsinga.
FOTO: HAUGALAND VEKST
Nysatsing skal gi lokal matproduksjon eit løft
Kommunane på Haugalandet, Rogaland fylkeskommune og lokale private aktørar går saman for å gi lokalprodusert mat eit løft.
Prosjektet Matregion Haugalandet» startar opp i 2025 og har fått ein million kroner frå det fylkeskommunale Regionalt næringsfond. Det kjem fram i ei pressemelding frå Haugaland Vekst IKS, som skal leie det toårige prosjektet. Det blir finansiert med støtte frå Rogaland fylkeskommune og innsats frå dei ni kommunane på Haugalandet: Haugesund, Karmøy, Utsira, Tysvær, Bokn, Sveio, Vindafjord, Etne og Sauda.
Forsyningstryggleik
Matregion Haugalandet har som mål å bidra til auka verdiskaping, fleire arbeidsplassar og større mangfald i den regionale matproduksjonen. Samstundes skal prosjektet styrke forsyningstryggleiken, folkehelsa og berekraftig areal- og ressursbruk. Aktivitetane i prosjektet vil involvere ulike funksjonar i kommunane, næringslivsaktørar, forbrukarar og ulike kompetansemiljø, heiter det i pressemeldinga.
