Nærmar seg sjukeheimsavgjerd

— Endring må til før eller seinare, og me bør få til ei samling av institusjonstenestene på ein eller annan måte, sa kommunalsjef Sigurd Gjerdevik i eit formannskapsmøte tysdag.

I dag har Vindafjord to sjukeheimar: Ølen omsorgssenter og Vindafjordtunet i Vats. Konsulentselskapet Agenda Kaupang foreslo i ein rapport i fjor å gjere om sjukeheimsplassane ved Ølen omsorgssenter til omsorgsbustader med bemanning for å møte dei demografiske utfordringane framover.

I budsjettet for 2025 og økonomiplanen for 2025–2028 blei det vedteke at kommunedirektør Yngve Folven Bergesen kan setje i gang arbeidet med å samle institusjonsplassane på Vindafjordtunet.