Det blir innført mellombels væpning for politiet i påska.
Foto: Vegard Wivestad Grøtt / NTB / NPK
Mellombels væpning av politiet i påska: Kyrkjer står fram som aktualiserte terrormål
Politiet er mellombels væpna over heile landet frå onsdag 27. mars til tysdag 2. april på grunn av ei oppdatert trusselvurdering.
Bakgrunnen er at Politiets tryggingsteneste (PST) beskriv at kyrkjer og kristne forsamlingsstader står fram som aktualiserte terrormål i påska, skriv Politidirektoratet i ei
pressemelding.
− Den viktigaste jobben til politiet er å tryggje befolkninga. Sjølv om det ikkje ligg føre konkrete truslar, har politidirektøren etter ei samla vurdering vedteke mellombels væpning for å sikre ein best mogleg beredskap gjennom påska, seier beredskapsdirektør Tone Vangen i Politidirektoratet.
Trusselnivået for Noreg samla sett er uendra, og politiet oppmodar folk til å feire påska som normalt trass at det kan vere meir synleg og væpna politi.
PST: Høgtider kan vere terrormål for ekstremistar
– Høgtider og merkedagar kan vere aktuelle terrormål for ekstremistar fordi det på slike dagar samlast mange menneske på ulike arrangement. I denne trusselvurderinga trekkjer vi fram mellom anna kyrkjer og kristne forsamlingsstader som aktualiserte mål, seier seniorrådgivar Eirik Veum i PST til NTB.
Representantar for PST er tilgjengelege for pressa ved lokala deira i Nydalen i Oslo frå klokka 14.15 måndag.
Kyrkjerådet: Glad for at PST følgjer med
Direktør Ingrid Vad Nilsen i Kyrkjerådet seier til NTB at ho er trygg på PST si vurdering.
Ho viser til ein liknande situasjon førre nyttårshelg, då det på bakgrunn av ei oppdatert trusselvurdering vart vedteke nasjonal væpning av politiet.
– Vi har jamleg kontakt med PST og er glad for at dei følgjer med slik at vi kan informere kyrkjene som planlegg arrangement i påska, seier Nilsen.
Ho legg til at Kyrkjerådet vil sende ut eit informasjonsskriv til kyrkjene seinare måndag ettermiddag.
