Med hjarte for dei eldre

— Dette var veldig kjekt. Eg er heilt sett ut eg. Dei har vore veldig flinke, seier 97 år gamle Liv Hansen og kikkar takksamt bort på elevflokken som har tatt turen til Ølen omsorgssenter for å overrekka ein sjekk på heile 23.251 kroner til bebuarane.

Den store pengegåva er eit resultat av julebasaren som elevar ved helse-og oppvekst VG1 stelte i stand før jul. Pengane frå basaren har dei øyremerka trivselstiltak på omsorgssenteret og nå er det opp til bebuarane og dei tilsette å finna ut kva tiltak dei ønskjer å bruka pengane på.

— Dette var ei kjempeflott gåve. Det er raust at dei har tenkt på oss. Dette gir oss mulegheit til å gjera litt ekstra for bebuarane og kanskje kan det bli ein konsert eller litt fleire bøker, seier leiar ved korttidsavdelinga ved Ølen omsorgssenter, Hanne Skjold nøgd.