Med elverafting på timeplanen
Utstyrt med oppblåsbare badedyr, luftmadrassar og flytebrett i ulike fasongar kasta elevar frå valfag friluftsliv ved Enge skule i Etne seg ut i Etneelva for å prøva seg på rafting.
— Nå skal me rafta i elva. Det er første gong me prøver på dette, seier Johanne Løhaugen (14) og Johanne Grindheim (14) og gjer seg klar til ein tur nedstraums.
Dei har funne fram kvart sitt badedyr heime som dei har tatt med seg til skulen, og nå ventar dei berre på klarsignal frå lærarane før dei kan kasta seg ut i vatnet.
Annonse
Dei er litt spent på om raftingturen vil gå bra og mest spent er dei om lufta held seg i badedyra når dei kjem til enden av elva.
— Me får håpa det går bra, seier dei.
Den litt uvanlege rafteturen er ein del av valfag friluftsliv for elevar i niande og tiande klasse. Kvar fredag ettermiddag tek dei friluftsglade elevane turen ut i det fri, enten til fots i nærområdet eller ein sykkeltur rundt om i bygda. Men å rafta ned Etneelva har dei aldri gjort før.
— Me hadde innspel om kva me ville gjera og kom med forslag om rafting, då meinte me seriøs rafting. Men me gler oss, seier dei to 14-åringane og smiler.
Annonse
Friluftsliv
Før den ivrige raftegjengen går ut i vatnet får dei ei grundig gjennomgang av sikkerheitsreglane. Alle er iført hjelm, redningsvest og enkelte har kledd seg i våtdrakt. Dei ivrigaste får prøva seg på fleire turar ned elva, men for enkelte held det med ein tur.
— Me har prøvd i fleire år å få rafta i Etneelva. Men då har det vore fiske. I år er elva stengt for fiske og me fekk lov. Turen har vore planlagt i fleire veker og i dag var me svært heldig med vêret, seier lærar Ann Rita Eike og passar på at alle som vil får seg ein tur.
Valfag friluftsliv er eit populært fag som mange ønskjer å vera ein del av. Dei siste to timane kvar fredag er sett av til turar ute i det fri, og ein gong i året pakkar dei sekken og dreg på langtur.
— Me prøver å få til ei overnatting i året. Då får me hjelp av foreldre til skyss, seier ho.
