— Me er klare til me får klarsignal

Valet av hovudentreprenør landa på bygg- og anleggsfirmaet All10, leia av prosjektleiar Frode Yrke.– Me kjenner godt til Yrke frå før, som har hatt prosjekt ved Aksdal senter tidlegare. Han kjem til å leie heile utbygginga, opplyser Brekke Førland.

All10 er eit Stavanger-basert selskap, men med avdelingar lokalt – mellom anna i Haugesund.

I utgangspunktet var planen oppstart av arbeidet før sommaren, men det rakk ein ikkje.

— Kva betyr dette for tidsskjemaet?

— Me er forhåpentlegvis der me skal vere. Denne veka har eg, saman med entreprenør, hatt møte med Vinmonopolet for å spikre ein framdriftsplan for dei. Det inneber å fastsetje beste tidspunkt for oppstart og kor lenge butikken kan vere stengd. Det er uunngåeleg at butikken må halde stengt ein kort periode når det skal jobbast med å utvide lokalet, forklarer senterleiaren.

Målet er å avgrense stenginga av Vinmonopolet til kortast mogleg tidsrom.

—Me må sjå på korleis ein kan løyse dette på best mogleg måte.

Parkeringbiletet

— Korleis står dette i høve til vegarbeidet?

— Me har valt å starte denne prosessen ettersom me får to innkøyringar. Det er forespegla at me får desse midt i september. Det er ikkje fastsett ein dato, men no klargjer me alle framdriftsplanar slik at me er klare til me får klarsignal.

Dei to innkøyringane vil innebere betre flyt på parkeringsplassane, og det vidare arbeidet er avhengig av dette momentet.

Senterleiaren fortel at dei òg har gode planar for parkeringsbiletet.
I samband med utbygginga vil dei nærliggande parkeringsplassane til Meny falle bort. Desse ønskjer dei å kompensere for i det vidare løpet:

— Tidlegare i år sende me inn eit forslag til Tysvær kommune om fornying av parkeringsplassen ved Meny på vestsida. Parkeringsplassen treng nye lys, oppmerking og ny asfalt. Difor har me i søknaden vår effektivisert parkeringsplassen, og får til og med fleire parkeringsplassar – med betre belysning. Dersom ein kan få dette godkjent frå kommunen, kan ein starte med asfaltering og lyssetting i samband med utbygginga.

Ho meiner parkeringsplassen desperat treng ei oppgradering, særleg med tanke på lys.

— Slik eg ser det har han ikkje ein haust igjen.

Logistikk

Logistikken er svært viktig i prosjektet ettersom det meste er avhengig av kvarandre. Det er mykje å følgje opp, men sidan det er jobba med i ein toårig periode er det oversiktleg.

Senterleiaren peikar på at senteret skal halde ope gjennom heile prosessen.

— Me ønskjer ikkje å vere grunnen til at folk ikkje besøker Aksdal senter.

— Har du roen og trua på at det er gjennomførbart?

— Absolutt. Det er svært dyktige fagfolk som jobbar på prosjektet, og ein har arbeidd med det i to år. Det er no det viktige arbeidet skjer, for det er no framdriftsplanane blir spikra og underleverandørane og dei tekniske faga kan setje datoar på prosjekta.

Det er ikkje sett ein sluttdato på prosjektet, men dei håpar å vere ferdige før jul.

— Det er svært viktig for oss å kunne tilby varene Vinmonopolet har i desember. Me legg til rette for ein god julehandel. Og dersom dei må halde stengt, er det ikkje snakk om lang tid.

Nytt prosjekt

Til slutt kan senterleiaren røpe at det vil skje meir i forlenginga av utbygginga på vestsida.

— Me kjem til å byggje meir ut enn det som alt er skissert. Det vil bli eit endå større senter, fortel ho hemmelegheitsfullt med eit breitt smil:

— Me er ikkje ferdige. Når tilbygget i vest står ferdig, byrjar me rett vidare på neste prosjekt – som me allereie er i gang med å teikne.