Mangor (43) skal leie storstova

— Det blir spennande og omfattande, seier dagleg leiar Mangor Bårdsen for Vindafjord kommune si drift av Vindafjordhallen.

Kommunen skal drifte symjehallen, medan partslaget Vindafjordhallen SA skal stå for drifta av bygdahusdelen av Vats si nye storstove.

Erfaring som badevakt

I utgangspunktet er leiarstillinga på 50 prosent. Bårdsen vil kombinere den med den gamle jobben sin som byggdriftar i kommunen, som han hadde i 100 prosent fram til no. Arbeidsoppgåvene som dagleg leiar blir å tilsetje personar og organisere bading, både for skule og fritid.

— Eg har alltid likt bading og var badevakt i den førre hallen, fortel Bårdsen.

Før han blei tilsett i kommunen, har Bårdsen 18 års erfaring frå slakteria til Nortura og Fatland i Vindafjord. Han hadde ulike leiarverv på Nortura.

Forutan Bårdsen er Kenneth Solheim tilsett som byggansvarleg. Han er utdanna innan automasjon og jobbar i dag på teknisk etat i Vindafjord kommune, med særleg ansvar for kommunale bygg i Skjold. Det gjeld skule, barnehage, omsorgsbustader og brannstasjon.

Styreleiar takkar av

Også Vindafjordhallen SA gjer seg klare til å flytte inn i den nye storstova. Janne Urdal Aursland gir seg som styreleiar etter å ha hatt vervet i fem år.

— Etter seks år i styret, og dei siste fem som styreleiar, kjenner eg at tida er moden for nye krefter. Eg har brukt mykje av fritida mi på dette arbeidet, spesielt dei siste to åra. Det har vore oppturar og nedturar, mykje ansvar og arbeid knytt til finansiering, innkjøp, detaljar rundt bygget, avtalar osv. Men mest av alt har det vore fantastisk kjekt å få vera med på å realisera dette flotte bygget, skriv styreleiar Janne Urdal Aursland i Vindafjordhallen SA i eit Facebook-innlegg.

Samvirkeføretaket hadde årsmøte i gymsalen på Vats skule torsdag 13. mars. Her heldt Urdal Aursland og prosjektleiar Frode Eike i Vindafjord kommune innlegg. Cirka 30 personar møtte opp. Eike synest det var ei god oppleving å vere på møtet og omtalar stemninga som positiv og forventningsfull.

Interimstyre

I tillegg til Urdal Aursland går Irene Haraldseid og Jarle Skrunes ut av styret. Øyvind Nordtveit og May Hilde Nesheim held fram. Nye styremedlemmer blir Kari Lie Stokka, Merete Vestre og Dan Strand Jensen. Karin Frøland gir seg som varamedlem, og Unni Olsen tek over. Martin Gjerde og Severin Fatland held fram som varamedlemmer.

— Sidan me no er inne i sluttspurten av prosjektet, etablerer me eit interimstyre som trer i kraft 1. mai. Dette vil bestå av både nytt og gammalt styre, og så tek det nye styret over frå 1. september, skriv Urdal Aursland.

Ho blir leiar for interimstyret i denne perioden. På årsmøtet blei det òg bestemt at Vindafjordhallen SA held fram med samvirkeorganisering. Alle lag og foreiningar i bygda blir inviterte til å bli med i partslaget. Dei gamle andelane blir reverserte, og alle blir no likeverdige partar med éin part kvar.

Satsar på kafé

Når den nye Vindafjordhallen står klar, vil partslaget gjere det dei kan for å få mest mogleg aktivitet i bygget. Det vil ha eit profesjonelt drive kjøken godkjent av Mattilsynet.

— Me ønskjer at det nye bygdahuset med kafé skal bli eit samlingspunkt i bygda, skriv Urdal Aursland.

Dei vil ha open kafé tilpassa aktivitetar og opningstider i symjehallen. I tillegg vil dei driva cateringverksemd og leiga ut storsal, møterom og meir. Styreleiaren håpar mange ønskjer å leggja feiringar, bedriftsarrangement og anna til bygda si nye storstove.

Det er mykje som skal på plass i bygget når det er ferdig frå GL Prosjektservice. Planlagd ferdigstillingsdato var i utgangspunktet 30. april. Eike fortel at entreprenøren jobbar for å halda planen, men tek forbehald om leveransar og eventuelle forsinkingar. Kommunen har difor formidla til samvirkeføretaket at dei ikkje kan garantere at bygget er klart til 17. mai. Difor har 17. mai-komiteen planlagt eit alternativ med stortelt også i år. Urdal Aursland understrekar at dersom bygget blir klart, skal dei sørgja for at folk får koma innom og sjå.

— Når det gjeld symjehallen, har entreprenøren sagt at dei nok må ha litt ekstra tid til testing og igangsetting, seier Eike.

Vindafjordhallen SA planlegg ei veke med feiring av bygget i slutten av august. Her blir det arrangement for alle aldersgrupper. Til Grannar fortel Urdal Aursland at dei er i prosess med å tilsetja ein dagleg leiar og ein kokk for bygdahuset, men at desse stillingane ikkje er endeleg besette enno.