LO-leiar Peggy Hessen Følsvik meiner staten kom med eit godt tilbod som førte til semje med dei i statsoppgjeret.
Foto: Ole Berg-Rusten / NTB / NPK
LO-leiaren: Vi fekk innfridd vårt viktigaste krav
LO får fullt gjennomslag for krava om auka kjøpekraft og éin tariffavtale i staten, seier LO-leiaren, som meiner tilbodet frå staten var godt.
LO vart til liks med YS samd med staten i statsoppgjeret og unngjekk dermed storstreik.
– LO fekk innfridd vårt viktigaste krav. Det betyr eit lønnsoppgjer med ei ramme som sikrar ei lønnsutvikling i tråd med industrien, på 5,2 prosent. Samtidig fekk vi gjennomslag for vårt andre hovudkrav, nemleg at alle dei tilsette i staten skal ha same tariffavtale. Det er viktig for frontfaget og den norske modellen, seier LO-leiar Peggy Hessen Følsvik i ein kommentar.
Ho meiner staten kom med eit godt tilbod, som gav god utteljing for dei tilsette.
