Fem års arbeid skal presenterast: Ingeborg Halvorsen (t.v.) og Siv Marie Øyjord ved Habiliteringsavdelinga i Helse Fonna er spente på korleis det digitale verktøyet retta mot barn og unge blir mottatt.
Foto: Eirik Dankel
Lanserer nytt hjelpemiddel for barn og unge
Etne-jenta Siv Marie Øyjord er éin av to initiativtakarar, pådrivarar og fagleg ansvarlege for eit digitalt hjelpemiddel som kan gjera kvardagen for barn og unge enklare. Etter fem års arbeid ved Helse Fonna er dei klare for lansering.
Det blir ein stor dag for Siv Marie Øyjord og Ingeborg Halvorsen ved Habiliteringsavdelinga i Helse Fonna i Haugesund då dei i neste veke drar til Bergen for å presentera det digitale verktøyet ViMo. Det skjer saman med samarbeidspartner Youwell.
Kort tid etter at invitasjonen var sendt ut, hadde over hundre personar meldt seg på lanseringa, som skjer fysisk i Grieg Gaarden, i tillegg til digitalt.
— Målet med verktøyet er å læra barna betre sosiale ferdigheiter. Det handlar rett og slett om å få og halda på venene, og på lang sikt kan det føra til at barnet som vaksen har større sjanse for å få seg ein jobb, og delta i yrkeslivet, seier dei initiativtakarane, i ei pressemelding sendt ut av Helse Fonna.
