Læring og tilflytting i seks tiår

— Det er heilt fantastisk å gå på Lundeneset. Her er det gode folk og eit trygt miljø, seier Theodor Vestbø Reimers, som går siste året på studiespesialisering.

Påbygg-elev Lilly Sofie Jakobsen er samd, og trekkjer fram alle aktivitetane elevane kan vere med på i fritida. Skulen har ei rekkje fasilitetar både inne og ute, og eit aktivt elevmiljø som arrangerer ulike aktivitetar. Når ein kjem til området, kan ein sjå ein discgolfbane, kunstgrasbane, sandvolleyballbane og leikeplass. Innandørs har dei alt frå eit gymsalbygg til ein stor scene som blir brukt i både skuletida og fritida.

Lundeneset VGS er ein kristen friskule med internat i Ølensvåg. Skulen er eigd av Misjonssambandet og tilbyr utdanningsprogramma studiespesialisering, sal, service og reiseliv, IT og medieproduksjon og påbygging til generell studiekompetanse.