For å få fast jobb som lærar i dag, er det krav om relevant fagleg og pedagogisk kompetanse». Dette ønskjer regjeringa å endre til krav om relevant lærerutdanning».
Erfaring frå klasserommet vil ikkje vere tilstrekkeleg for å fast jobb, skriv Kunnskapsdepartementet i ei pressemelding.
Ifølgje Utdanningsforbundet manglar ein av fem lærarårsverk i skulen lærarutdanning. Forbundet er blant aktørane i skulesektoren som ønskjer seg ei slik lov.
– Bidreg til auka status
Søkjartala til lærarutdanningar fall med over 20 prosent i år samanlikna med 2022. Det skjer etter ein storstreik sommaren og hausten 2022, som enda i tvungen lønnsnemnd.
– Endringa vil bidra til at barna våre får god opplæring av lærarar med lærarutdanning, og til å utvikle skulen. Det vil også bidra til å auke statusen til læraryrket og vere med på å gjere det meir attraktivt for dei som skal velje ei utdanning, seier den ferske kunnskapsministeren Kari Nessa Nordtun (Ap) i pressemeldinga.
Lovforslaget opnar likevel for å tilsetje lærarar på vilkår av at dei fullfører lærarutdanning, viss det ikkje er kvalifiserte søkjarar.
– Når skulane ikkje får søkjarar til lærarstillingar som oppfylle kompetansekrava, meiner eg det er viktig at dei vurderer å tilsetje dei som ønskjer å fullføre ei lærarutdanning. Mange kommunar gjer dette allereie i dag, og no foreslår vi endringar i lova som vi meiner vil støtte det arbeidet, seier Nordtun.
Ingen mistar jobben
Regjeringa foreslår også å gjere tydeleg i lova at det berre er dei som er tilsette i lærarstilling, som kan ha ansvar for opplæringa.
Dei som er tilsette i lærarstilling utan relevant lærarutdanning, kjem ikkje til å miste jobben viss lova trer i kraft.
– Ingen som er tilsette i lærarstilling skal avskiltast, seier Nordtun.
Høyringsfristen er 5. januar, og Kunnskapsdepartementet tek sikte på at lova kan tre i kraft i august 2024.
