Han gjer no alvor av det omstridde forslaget om endringar i konkurransefremjande tiltak i meierisektoren som forgjengaren hans Sandra Borch (Sp) sende på høyring i sommar.
Endringane inneber ifølgje regjeringa at tilskota til Tines konkurrentar Q-meieriene, Rørosmeieriet og Synnøve Finden blir kutta med omtrent 50 millionar kroner til rundt 150 millionar kroner i året.
Åtvarar mot høgare prisar
I høyringsrunden i haust har forslaget møtt mykje motstand. Regelrådet, som undersøkjer forslag som blir sendt på høyring, meiner forslaget ikkje er tilstrekkeleg greidd ut. Samtidig har både delar av bransjen og staten sitt eige tilsyn for konkurranse åtvara.
– Endringane som er foreslått, vil etter Konkurransetilsynets vurdering kunne føre til ytterlegare svekking av ein allereie svak konkurranse i meierimarknadene, med risiko for dårlegare utval og høgare prisar til forbrukar, skreiv avdelingsdirektør Beate Milford Berrefjord i Konkurransetilsynets høyringssvar.
– Kvifor høyrer de ikkje på Konkurransetilsynet, Pollestad?
– Eg meiner at vi har lytta til dei. Tines konkurrentar beheld 75 prosent av støtta. Hovuddelen av støtta som blir kutta, er pengar Q-meieriene og Rørosmeieret får for å frakte mjølk ut i butikk, men ifølgje Landbruksdirektoratet kan det ikkje påvisast at desse har høgare kostnader ved distribusjon frå meieri til butikk enn det Tine har.
Konkurransetilsynet meiner på si side at store ulikskapar i meieristruktur framleis fører til store ulikskapar i fraktkostnader.
– Konkurransen vil ikkje forsvinne
– Har det noko å seie for regjeringa viss prisane på meieriprodukt blir høgare som følgje av desse endringane?
– Konkurransen vil ikkje forsvinne med dette. Eg er nokså trygg på at norske meieri og daglegvarebutikkar framleis skal klare å halde fram med å vere konkurransedyktige mot mandelmjølk, jus eller brus.
– Vi ser no at Q-meieriene har 40–50 prosent marknadsdel i sentrale strøk. Dette er ein heilt annan situasjon enn det som var tilfelle då tilskotet vart innført, seier Pollestad.
Q-sjefen sende bekymringsmelding» til Støre
Q-meieriene er blant dei som har åtvara mot dei foreslåtte endringane.
E24 skreiv søndag at Q-sjef Kristine Aasheim sende det ho sjølv omtalte som ei bekymringsmelding til Statsministerens kontor (SMK) med tittelen Useriøst av Pollestad».
I brevet gjekk ho ut mot Pollestads framferd i Dagsnytt 18» på NRK torsdag førre veke, der han diskuterte dei foreslåtte endringane.
Vi reagerer meget sterkt på argumentene og usannhetene statsråden brukte i debatten for å forsvare sitt standpunkt», skreiv Q-sjefen til SMK.
Aasheim reagerte mellom anna på at Pollestad sa at mjølkebøndene betaler for tilskotsordninga, når ho ifølgje henne til sjuande og sist er betalt av forbrukarane.
Ifølgje E24 er Aasheim bekymra for eksistensen av selskapet som følgje av endringane som Pollestad no innfører. Q-meieriene har sjølv berekna at endringane vil bety omtrent 63 millionar kroner mindre i året for dei.
Trur Q-meieriene vil klare seg
Geir Pollestad viser til at det har vorte brukt rundt 2 milliardar kroner på dei konkurransefremjande tiltaka sidan ordninga vart innført i 2007.
– Eg meiner definitivt at det vi gjer i dag, vil sikre Q-meieriene framover. Vi såg at å kutte heile støtta vart for dramatisk, og derfor held vi oppe ein stor del av støtta, seier han.
– Er det slik at de meiner at Tines konkurrentar kan takke seg sjølve viss dei ikkje no klarer å stå betre på eigne bein?
– Vi legg til grunn at Q-meieriene, Rørosmeieriet og Synnøve Finden vil klare å stå vidare i framtida. Samtidig er det eit oppspring av små produsentar, mellom anna osteprodusentar, som ikkje får noko av desse pengane, men likevel klarer seg.
Utset innføringa med eit halvt år
Pollestad stadfesta så seint som tidlegare denne månaden at planen var å innføre endringane før nyttår.
No er det likevel klart at endringane i tilskota først kjem frå 1. juli neste år.
– I og med at vi er såpass nær årsskiftet vil vi gi aktørane meir tid til å tilpasse seg, mellom anna fordi dei allereie kan ha inngått avtalar med kjedene, seier Pollestad.
