Sommaravisa
Kulturhistorisk vandring gjennom vakker natur
Ein spasertur langs Kulturstien på Bjoa byr på ei unik vandring gjennom vakker krattskog, over glatte svaberg, forbi interessante fortidsminne og med ei idyllisk utsikt over fjorden som prikken over i-en.
Kulturstien på Utbjoa er ein populær sti som er mykje brukt både av fastbuande og hyttefolk. Den tre kilometer lange turstien startar og endar opp like ved kaien på Utbjoa og byr på flotte naturopplevingar og ei interessant tidsreise frå steinalder til nåtid. Noko av det første turgåarane møter når dei tek turen langs kulturstien er eit stort berg med spor etter før-historisk tid. Kulturstien passerer til saman fire helleristningsfelt og to felt med skålgroper, og i helleristningsfeltet nærmast Utbjoa-kaien finn ein spor av begge dei to formene av førhistorisk bergkunst.
— Helleristningsberget har helleristningar med båtmotiv, solkors og skålgroper, fortel Nils Terje Oma frå Bjoa.
Han er nærmaste nabo til kulturstien og veit nøyaktig kor ein kan finna spor etter fortida.
