Krotekaker med lokal vri

I det nyoppussa klubblokalet til sanitetslaget i Ølen er det full aktivitet. Krotakakebakst står på programmet denne kvelden og ein gjeng bakeglade damer har samla seg rundt bakstebordet for å læra kunsten å baka dei tradisjonsrike kakene. Deigen er alt blanda saman og utkjevling står for tur. Utrusta med krotekjevle, bakepinne og ein god porsjon tolmod trillar kursdeltakarane ut leivane med stor iver, og litt etter litt blir dei små deigklumpane omforma til runde emne og klargjort for steiking.

— Eg har aldri prøvd dette før. Me hadde litt startproblem, men nå går det betre. Me har laga deigen frå botnen og kvar deig gir 18 emne, seier Anne-Britt Gregersen.

Ho er styremedlem i sanitetslaget og deler bakstebord med leiar Else Fosso denne kvelden. Saman får dei prøva seg på baking av krotekaker for første gong.