— Å vere open om sjukdommen har hjelpt meg. Det er godt å ikkje vere åleine med alle tankane, seier Arthur Hansen.
FOTO: TORSTEIN TYSVÆR NYMOEN
— Kreften skal ikkje få vinne
Hausten 2017 fekk Arthur Hansen (26) beskjeden som snudde opp-ned på livet hans. No kjempar den unge skåneviksbuen mot kreften. Med immunterapi og ved å dyrke alt som gjer livet verdt å leve.
— Eg hadde kjent på kroppen at noko ikkje var som det skulle. Og eg var budd på at det kunne vere noko alvorleg. Likevel var det jo eit sjokk, fortel Arthur Hansen.
Me sit i stova til foreldra hans, i Ligrend i Skånevik. Ansiktet er ramma inn med mørkt hår, litt skjegg og kledelege briller. I vindauget bakom han glir bilferja MS Kvinnherad» frå kai og set kursen mot Utåker for fjerde gong denne føremiddagen. Kvardagslivet er i gang som vanleg.
Arthur er eit kjent ansikt for mange i Skånevik. Ein ung mann som likar å snakke med folk. Han har jobb på attføringsverksemda Øyane ASVO i mange år, og har budd i Etne for å komme nærmare jobben han likar så godt. Men no er han sjuk. Og har flytta heim til foreldra sine for å ha nokon rundt seg i ei krevjande tid.
