Klar for viktig møte om bygda si framtid

— Alle som bur i Skjold og har ei meining om korleis me skal ha det her, bør få med seg dette møtet. Eg oppmodar alle til å komme, seier leiar Joacim Haraldseid Strand i Skjold Bygdalag.

Møtet er på Skjold Arena. vil det bli orientert meir om medverknadsopplegget og korleis kvar enkelt kan gje si stemme. Haraldseid Strand håpar at dei får ein god dialog med kommunen, og han håpar og trur at mange nyttar høvet til å møte opp og komme med innspel.

— Mange eg har snakka med, har gode tankar om korleis me vil ha det i Skjold, seier grendalagsleiaren.

Slik han forstår det, er dette planen som legg grunnlaget for korleis dei skal utvikle Skjold i lang tid framover.

Planområdet er i hovudsak avgrensa mellom dei to store knutepunkta i tettstaden: Isvik, med butikk, kafé og legekontor, og Vikaneset, med barnehage, skule og idrettsanlegg. Det tek med seg det området som har dei største utfordringane med tanke på trafikkavvikling, med aktuell del av Skjoldvikvegen og området som kan vere aktuelt for ein avlastingsveg mellom Isvik og Vikaneset.

Folkevekst

Vindafjord kommune skriv på nettsida si at med utgangspunkt i sterk folkevekst dei siste fem åra, behovet for oppdatert planverk, gode løysingar for all intern trafikk i tettstaden og eit avklara sentrumsområde med potensiale for utvikling, ønskjer dei både ein strategisk plan med gode målsettingar og visjonar for Skjold, men også ein operasjonell plan med gode og konkrete løysingar.

Med planen ønskjer kommunen å få svar på følgjande spørsmål:

• Korleis kan ein områdeplan sikre ein heilskapleg plan for infrastruktur og det offentlege rom?
• Korleis kan planen samtidig skape eigarskap og entusiasme for ein berekraftig utvikling av bustad og sentrum?
• Korleis kan me sikre at planen blir gjennomført?

4. november vedtok formannskapet å sende forslaget til planprogram med konsekvensutgreiing for områdeplan for Skjold på høyring, saman med varsel om planoppstart. Dei vedtok òg å utvide planområdet slik at heile bustadfelta, samt det ferdigregulerte feltet nord for Skjoldalifeltet, blir ein del av planen.

Vil sikre møteplassar

Det blir understreka at områdeplanen ikkje skal løyse alle utfordringane i Skjold, men gjennom gode prioriteringar sikre at ein får dekt dei viktigaste behova.

— Målet er at Skjold skal få gode møteplassar med trygge vegar og stiar som bind saman tettstaden, skriv kommunen.

Samtidig vil kommunen skape eigarskap og entusiasme for ein berekraftig utvikling av bustad og sentrum. Dei slår fast at for å få til dette, må planprosessen involvere alle relevante aktørar. Dette er både grunneigarar, bebuarar, næringsliv, grendeutval og andre grupper som blir påverka av eller har interesse av dette planarbeidet.

Vindafjord kommune ønskjer både ein strategisk plan med gode målsettingar og visjonar for Skjold, men også ein operasjonell plan med gode og konkrete løysingar. Visjonen må sikre livskraftige knutepunkt og binde saman og danne ein solid og handlekraftig tettstad for Skjold inn i framtida.

Frå kommuneplanen ligg det eit ønske om å bygge ein trygg tettstad og eit sterkt sentrum som skal vere godt å bu i og besøke. Her skal folk kunne vere aktive heile livet og ha ei berekraftig utvikling, og trygge og gode vegar og stiar.

Allereie i forkant av formell oppstart av planarbeidet er det gjennomført noko medverknad. Planprogrammet inngår som eit ledd i varsling av planoppstart, og skal danne grunnlaget for planarbeidet og avklare rammer, mål og utfordringar.

— Forslag til planprogram gjer greie for bakgrunnen for planarbeidet, kva me vil oppnå med planen (Del 1), rammer for planarbeidet (Del 2) og korleis me skal løyse oppgåva (Del 3), forklarar kommunen.

Brei medverknad

Når planprogrammet er vedteke, vil det bli arrangert ulike medverknadsmøte og verkstadar i mindre og større grupper for å favne dei ulike temaa og nå viktige interessegrupper. Kommunen poengterer at det er særleg viktig å nemne Rogaland fylkeskommune og Statens vegvesen knytt til veg og kryss, barn og unge knytt til mjuke trafikantar, og grunneigarar og næringsliv knytt til sentrumsutvikling.

— Det er aktuelt å gjennomføre fleire opne møte og ei spørjeundersøking i løpet av arbeidet med planen, skriv Vindafjord kommune, som understrekar at detaljert plan for medverknad må tilpassast behovet undervegs.

Rådgivar Anne Sofie Sandvik for FDU-investeringsprosjekt er ansvarleg for utarbeiding av områdeplanen. Ho tek imot innspel og kan svare på spørsmål.

Frist for å sende merknader til planen er 31. desember. Målet er at planen skal vere ferdig i løpet av 2027.