Kjempeinteresse for barnehagen

Med 17,8 årsverk er Nausthaugen Barnehage AS ein arbeidsgjevar av ikkje ubetydeleg storleik i Vindafjord kommune.

— Det er til saman 22 tilsette her. Slik me har lagt det opp no har me kapasitet til å ha 88 barn, men me har 60, seier Åshild Blikra som er leiaren av barnehagen.

Då Vindafjord kommune bestemte seg fra å leggja ned barnehagen i Øvre Vats, vart det ein ny situasjon i barnehagedrifta i bygda. Nausthaugen barnehage var opphavleg starta opp av Hatteland-konsernet, men etter ulike driftsmodellar var det Åshild Blikra som i seinare år har eigd den private barnehagen.

Hatteland-konsernet kom inn i biletet att, og Blikra og konsernsjef Stig Hatteland er einige om at dei har vore løysingsorienterte då dei gjekk for å utvida og modernisera barnehagen som resultat av den nye situasjonen. Dei meiner at dei har fått dette til på ein god måte i samråd med kommunen.

— Me har brukt ein del meir tomteareal på barnehagen enn det var frå før, og det er på ein god måte med på å skapa meir liv her nede i sentrum av Åmsosen, seier Hatteland.

Åshild Blikra har vore tilsett i Nausthaugen Barnehage sidan 1997, og har opplevd ulike driftsmodellar.

— Slik det er no passar det meg svært godt, og eg har veldig flinke folk rundt meg. Me har fem ulike basar i den nye barnehagen, men det er mogleg å utnytta romma på ein måte som gjer at me kan ha ein sjette base, seier Blikra.

Av dei første

Private barnehagar er vanleg no, men det var ikkje slik då Hatteland-konsernet beslutta å laga eigen. Det heile byrja for snart førti år sidan då konsernet var ute etter å gje eit attraktivt tilbod til eigne tilsette i jakta på å få folk med høge og passande kvalifikasjonar til Vats.

Allereie på 80-talet var det symjebasseng i barnehagen, og det er kun denne delen som no står att før heile den nye barnehagen framstår fullt renovert.

Alle barnehagar har ikkje eigen liten gymsal, sanserom, verkstad for born og samlingsrom som kan husa alle barna på same tid. I tillegg er det svært mange andre ting, og ein legg mellom anna merke til eit særleg vel utrusta kjøken og kontorfasiliteter for dei tilsette.

Tuntre

Barnehagen er det første ein ser når ein kjem ned mot sentrum av Åmsosen, og ein slåande detalj er den store blodbøka som står godt inne i barnehagen. Det er tilpassa sitjeplassar rundt stamma, og heile den nye barnehagen får eit langt mindre preg av å vera nyleg anlagt på staden.

— Det stod eit hus her tidlegare kor dette treet var ein del av eigedomen. Me er glade for å ha klart å behalda det, seier Stig Hatteland.

Nett no står det i nydelege mørkeraude fargar og gjer skugge på varme dagar, og elles ly for regn og vind på andre dagar.

Uteområdet er ei fin blanding av dempa underlag, kunstgras, gras og sand. Det kan bli langt mellom skrubbsåra i denne barnehagen.

Logistikken rundt ein barnehage kan vera prega av ei mengd barnevogner og anna større utstyr, men i nye Nausthaugen er det naturlegvis oppvarma uteboder for slikt.

Utandørs er det ei mengd ulike leikeapparat, små bygningar, ballbinge og ein gedigen sandkasse. Bygda som har fleire anleggsentreprenørar enn samanliknbare bygder, og har fostra fleire fotballspelarar på høgt nivå, kan i framtida ikkje gje barnehagen skulda om ikkje det blir fleire av dei slaga.

Teknisk avansert

Som forventa når Hatteland-konsernet er involvert, er det eit teknisk avansert bygg som er reist i Åmsosen. Stig Hatteland fortel at det er fleire godt gjennomtenkte løysingar, og at det sjølvsagt er solcellepanel på taka.

— Ein barnehage har faktisk ikkje lov til å selja straum, men med eigarmodellen vår lar det seg gjera at det er konsernet som kan stå for straumproduksjonen, seier Stig Hatteland.

Areal er det meir av inst i Vatsfjorden der utfylling dei siste åra har laga eit anna landskapsbilete enn det var for få år sidan. Stig Hatteland går ikkje i detalj om dei totale planane, men er det naudsynt så er det enkelt å utvida arealet til barnehagen. Det er til dømes ganske mykje areal mellom den nordlige delen av barnehagen og den store parkeringsplassen som er anlagt der.