Å lesa høgt for kvarandre er ei god oppleving og dannar grunnlaget for samtalar og diskusjon.
Foto: Grethe Hopland Ravn
Inviterer til ny lese-oppleving
Vindafjord bibliotek har starta opp ein lesering, der både høgtlesing og samtalar rundt det ein les står i sentrum. Målet er å dela lesegleda, og å få eit litterært pusterom.
Det handlar Sam. Guten som er ny i klassen, som har alt. Ny sykkel, stort hus, eige soverom og stort penalhus med minst 20 fargar i. Faren har ny Ford og på toppen av det heile har familien eigen garasje. Sam er fin på håret, har nye klede og eit herbarium som er større og flottare enn alle andre sitt. Men det han ikkje har – er venner.
Med innleving les Ingrid Mathilde Sørvåg høgt frå novella om Sam, og med jamne mellomrom stoppar ho opp og stiller spørsmål til det ho nettopp har lese. Kva tenkjer ein om slikt?
— Eg trur dette er frå eldre dagar. I dag er det ikkje uvanleg at barna har sykkel og eige soverom, eller at foreldra har garasje, seier Dagfrid Nagel-Alne frå Vikebygd.
