I spora av den kalde krigen

Den ragar 812 meter over havet og lyser imot enten du kjem nord, sør eller vest. Kvifor forsvarsalliansen Nato eigentleg valde å bygga ein stor bemanna stasjon på toppen av det staute fjellet mellom Sandeid og Vikedal, var det lite lokalbefolkninga fekk vita om den gongen, men etter tre tiårs drift var det over for den topp hemmelege militære stasjonen med store radarskjermar, antenner og radiomaster.

I dag er det igjen ein del sivilt utstyr for formidling av signal til fjernsyn, mobiltelefon og data på Lysenuten. Elles er det turfolket som eig» den majestetiske fjelltoppen.

Og den som set av ein liten dag og tar seg opp til fots, får betalt. I tillegg til trimmen og opplevinga sjølve turen gir, er det knapt ein fjelltopp i Vindafjord og Etne kommune som kan måla seg med utsikta frå Lysenuten. Vel du ein dag med skyfri himmel og klarvêr, kan det vera mogeleg å sjå like til Stavanger. Motsett veg vil kanskje både Utsira, Bømlo og Folgefonna skimtast i det fjerne.