Hjelpeorganisasjon endrar namn

Då organisasjonen Barn av rusmisbrukere vart starta i 2009, trongst eit namn som var direkte og ærleg. No endrar organisasjonen namn til Ly – for deg med en oppvekst preget av voksnes rus.

Namnebytet kjem etter tydelege tilbakemeldingar frå personar med eigne oppveksterfaringar.

– Tida har endra seg, både språket, haldningane og måten vi snakkar om oppvekst og rus på. Det har vi lytta til, forklarer Kristin Oudmayer, generalsekretær i Ly, i ei pressemelding.

Fleire har uttrykt at det gamle namnet kunne opplevast som ein merkelapp, og at det gjorde det vanskeleg å ta kontakt eller vere aktiv i organisasjonen.

– Det gamle namnet hadde ei viktig rolle då det vart valt. Samtidig er det fleire som seier rett ut at namnet er ein barriere i dag. Ikkje fordi det er feil, men fordi dei ikkje alltid ønskjer eller treng ei så tydeleg nemning på seg sjølv, seier Oudmayer.

Namnebytet blir gjort for å gjere organisasjonen meir tilgjengeleg for alle som har vakse opp, eller veks opp, i heim prega av rusa til vaksne. Eit nytt namn skal òg gjere det enklare å nå breiare ut, rekruttere fleire brukarstemmer og frivillige, styrkje det politiske arbeidet for betre støtteordningar og tenester, og bidra til å redusere stigma, skriv organisasjonen.

(NPK)