Her blomstrar det året rundt

På Øyane i Etne ligg ein hage litt utanom det vanlege. Eit blomsterhav av dei sjeldne kjenneteiknar den frodige hagen som består av ei vakker blanding av blomar, buskar, tre og nyttevekster. I det store drivhuset har det blitt dyrka fram utallige planter opp gjennom åra, og frå kjøkkenhagen kan hageeigaren henta inn frisk salat og grønsaker til middagsbordet. Men mest av alt handlar det om blomar i alle slags fasongar og fargar.

— Det blømer frå slutten av januar. Då kjem vinterblom eller erantis som blømer lenge og legg seg som eit teppe. Så kjem juleroser og krokus og så går det i eitt med bløming. Den eine går over i den andre og eg har blomar heile året, seier Ida Flesland og riv opp eit par ugrasstrå som har slått seg ned i eitt av dei mange frodige beda i hagen.

Den hageglade dama har likar svært godt å stella i hagen og er ute nesten kvar einaste dag for å syta for at blomar, buskar og trer får best mogeleg vekstvilkår. I den drygt eitt mål store hagen bugnar det i dei velstelte beda enten kalenderen viser vinter eller vår, og når sommaren står for døra eksploderer det i fargar og dufter over heile hagen og gjev hageeigaren ekstra løn for strevet i form av eit blomsterhav dei fleste hageeigarar berre kan drøyma om.