Har sendt bekymringsvarsel

Konflikten mellom dei tilsette i EBR og administrasjonen i kommunen skrur seg til. Etter det ekstraordinære formannskapsmøtet som fann stad tysdag i førre veke, har brannsjef Finn Ulvund nå sendt eit bekymringsvarsel til Etne kommune, ved kommunalsjef Åsmund Andersen Sekse.

I varselet skriv Ulvund at han med bekymring registrerer korleis kommunalsjef, kommunedirektør og ordførar kommuniserer informasjonen rundt den vedtekne brannordninga ut til både politikarar og til offentlegheita gjennom kommune-tv.

— Dei kritiserer både tillitsvalde, eigne tilsette i brannadministrasjonen og kjem med uriktig og upresis informasjon. I tillegg held dei tilbake informasjon om ting dei er kjent med og dette skapar inntrykk av at både varabrannsjef, tillitsvalde og eg som brannsjef ikkje evnar å ivareta drifta av EBR på ein forsvarleg måte, uttalar Ulvund i varselet.