Har mista lys på skuleleikeplassen
Ein jordfeil gjer at det manglar noko utelys ved leikeapparata på Vats skule. Feilen blir retta når leikeapparat frå den nedlagde kommunale barnehagen i Øvre Vats blir flytta ned til skulen.
Dette opplyser Berit F. Haugsland, leiar for kommunaltekniske tenester i Vindafjord. Ho understrekar at lysmangelen er avgrensa, og at det er godt med utelys på heile framsida av skulen.
– Det manglar noko lys på baksida, der leikeapparata står. Eg veit ikkje om det er heilt mørkt der, fortel Haugsland.
Annonse
Ho kan ikkje tidfeste når feilen blei meldt inn. Kommunen ser for seg å rette opp feilen i samband med at dei skal flytte nokre leikeapparat. Haugsland forklarar at apparat frå Vats barnehage – den kommunale barnehagen i Øvre Vats som blei tatt ut av drift då all barnehagedrift i Vats blei flytta til private Nausthaugen Vats tidlegare i år – skal flyttast til skulen. Apparat frå andre delar av skuleområdet skal også flyttast dit. Flyttejobben skal bli bestilt.
– Me har ikkje detaljplanlagt når apparata skal flyttast, men me jobbar med det. Det blir gjort så snart som mogleg, men det kjem an på vêrforholda, seier einingsleiaren.
Dette skuldast at det skal leggast fallunderlag under apparata.
