Godt rusta for korte og lange turar

Heilt sidan ho var lita har Anna Håland Miljeteig (10) og familien i Sandeid nytta helger og ledige stunder til å ta seg ein tur ut i det fri. Enten det er snakk om korte turar i nærmiljøet eller timelange vandringar i den norske fjellheimen. Rett utstyr er viktig når ein legg ut på tur og i sekken har dei med seg alt som trengst for korte eller lengre turar.

— På korte turar er det viktig med drikke og mat, og så må me ha med lue, sokkebyte og brødpose til å ha på beina dersom skoa blir våte, seier Anna Håland Miljeteig og viser kva ho pleier å ha med seg i sekken når ho skal ta seg ein tur i fjellet.

Kart og kompass, solkrem og ein ekstra genser kan vera nyttig å ta med sjølv på korte turar, og for kosen si skuld er det alltid godt med litt frukt, nøttemiks og ein sjokoladebit.