Modolf Haraldseid (H) la fram tilleggsforslag. Her saman med Øyvind Valen (Ap), Mats Årvik (Frp), ordførar Ole Johan Vierdal (Sp), Gustav Løge Fosse (Krf) og Therese Nesheim (H).
Irene Mæland Haraldsen
Gjekk for planregulering - øyremerka biogassanlegg
Med ein del tilleggspunkt vedtok formannskapet i Vindafjord å endra detaljregulering for deler av Nerheim Næringsområde i Ølen med tanke på eit mogleg komande biogassanlegg.
Føremålet med planendringa er å
konkretisera arealbruk for deler av for Nerheim næringsområde, for etablering
av eit biogassanlegg som skal handtera inntil 226.000 tonn biomasse årleg.
Planendringa var oppe til førstegongs behandling i formannskapet og eit samla
formannskapa sa seg einige i planendringa som inneber å endra arealføremålet frå
næring/lettare industri til industri i den sørlege delen av næringsområdet i
Ølen.
I tillegg til det opphavlege forslaget frå
kommunedirektøren, la Modolf Haraldseid (H) fram eit tilleggsforslag som
formannskapet stilte seg bak. I forslaget vil det bli innarbeidd og dokumentert
fleire tilleggspunkt før planendringa vil bli lagt ut til offentleg ettersyn.
I tilleggsforslaget heiter det mellom anna
at konsekvensutgreiinga og Statsforvaltaren sine innspel skal løftast tydeleg
fram når høyringa vert sendt ut. Det skal også koma fram korleis konsekvensutgreiinga
er handtert i planprosessen. I tillegg skal det utarbeidast eit konkret program
for å utvida medverknad i høyringsprosessen, noko som inneber at det kan arrangerast
opne dialogmøte i Ølen og eigne møte for bebuarane i området der
biogassanlegget kan koma. Det er også lagt inn i forslag om at Sandeidvegen og
Njordvegen skal skiltast og ha høgintensiv belysning.
