Gir hundrevis av hestar nye sko

— Eg starta som hovslagar i 1999 etter å ha gått på kurs. I dag jobbar eg fulltid som hovslagar og skor rundt 800 hestar i året, seier Ingar Ivesdal som har både privatpersonar og ridesenter i Vindafjord, Karmøy og Haugesund på kundelista.

Om lag kvar sjette veke treng hesten å få byta skotøyet sitt og denne ettermiddagen er det ein av hestane ved Frønsdal Aktivitetsgard i Ølensvåg som står for tur.

— Hestar får sine første sko i to til tre års alderen, når dei blir sett i trening. Dersom hesten går for lenge utan nye sko kan den få problem med beina, forklarar Ivesdal og tek fatt på dagens arbeid.