Gav seg på topp
I år blei etter alt å dømme fjerde og siste året for loppemarknad og auksjon Vikedal, og dei ga seg på topp i helga med stinn brakke på bygdehuset.
Det var fullt til randa med saker og ting til ein billeg penge, frå det kvardagslege til det kuriøse. I vel ein time gjekk større og til dels meir verdifulle ting under hammaren under auksjonen, leia av auksjonarius Bjarne Hjelvik og Ottar Andreassen. Andreassen tilførte autoritet ved å stille i den gamle lensmannsjakka til faren, som var lensmann i bygda i gamle dagar. Hjelvik stod for humoren.
— Kven vil kysse kokken, spurde han, då det var nokre moroskilt ein typisk ville hengt på kjøkkenet som var oppe for bod.
— Eg vil, kom det ein stad frå den fullsette foajeen. Så gjekk nå dei livlege emaljeskilta i det minste til ein femtilapp eller to over utropspris.
