Sommaravisa
Gardsidyll med historisk sus
I eit gamalt restaurert hus midt i Vikebygd har Jakob Rødde (69) tatt i mot gjester til små og store lag, overnatting og servering i over 20 år. Nå har han supplert tilbodet med eit fullrestaurert eldhus til bruk som serveringsstad.
Gamlatunet ligg idyllisk til like ved hovudvegen gjennom Vikebygd og består av hovudhus, eldhus, stabbur, uthus og løe. Hovudhuset på garden blei bygd rundt 1840, løa er frå 1870-åra, medan eldhuset er litt eldre. Eit grishus og eit stabbur er av litt nyare dato, og det gamle kvernhuset som stod på garden er nesten heilt borte. For snart 25 år sidan skifta eigedomen eigar og blei kjøpt av nabogarden som tilleggsjord. På kjøpet fekk den nye eigaren eit tun med bygningar som sårt trengte ei hjelpande hand for å overleva. Eit omfattande restaureringsarbeid blei sett i gang og etter fleire år med hardt arbeid kunne dagens eigar Jakob Rødde, opna dørene til eit totalrenovert våningshus klart til å ta i mot gjester som enten ønskte seg ein stad å sove for natta eller ville leige lokale til små eller store samlingar.
— Eg fekk alle dei gamle husa med på kjøpet. Dei var til nedfalls og eg visste ikkje heilt kva eg skulle gjera med husa. Eg søkte om midlar og fekk avslag, seier Jakob Rødde som fekk hjelp av uventa hald til å setja hovudhuset i stand.
— Ein hyttenabo sponsa med midlar. Han ønskte at huset skulle bli tatt vare på, seier han.
