Forsking viser effekt av elsykkelstøtte, men politikarane er skeptiske

Ny forsking viser at økonomisk støtte til kjøp av elsyklar fører til auka sykkelbruk og redusert bilkøyring. Trass i dette er dei fleste stortingspartia skeptiske til å innføre ei nasjonal støtteordning for elsyklar.

Forskar Hanne Beate Sundfør ved Universitetet i Agder har funne at dei som fekk subsidiar til elsykkel reduserte bilbruken med 10 prosent og auka sykkelbruken med mellom 13 og 22 prosentpoeng samanlikna med dei som ikkje fekk støtte, skriv NRK.

– Når du blir subsidiert blir terskelen lågare for å kjøpe elsykkel. Og når ein først har den i hus, ser ein at folk både syklar lengre og oftare enn det dei gjer utan elsykkel, seier Sundfør til allmennkringkastaren.