Flykta frå krig til eit betre liv. Mor Saido Mohamed Warsame saman med dottera Tasniim (3) og far Abdiaziz Mohamed Yusuf med sonen Mohamed Nasiim (6 veker) heime i Ølen.
Foto: Irene Mæland Haraldsen
Flykta frå krigen til eit trygt liv i Ølen
Med stort pågangsmot og eit håp om eit betre liv la Saido Mohamed Warsame (33) frå Somalia ut på flukt frå krig og terror i heimlandet. I dag har ho skapt seg eit trygt liv saman med ektemannen og sine to barn i Ølen, men vegen har vore både lang og utfordrande.
Året er 2012. Borgarkrigen og terror har herja republikken på Afrikas horn i årevis og tusenvis av menneske er drivne på flukt. For Saido Mohamed Warsame er utsiktene for eit trygt og godt liv i heimlandet Somalia i ferd med å bleikna, og den unge kvinna i byrjinga av 20-åra, er tvungen til å forlata landet. Heilt åleine legg ho ut på ei farefull ferd til nabolandet Etiopia, før ho til slutt endar opp i Noreg og Moi flyktningmottak. Etter eitt års tid går vegen vidare til Ølen der ho endeleg augnar håp om ei trygg framtid.
— Eg var 24 år då eg kom til Noreg. Eg måtte flykta frå krig og kom til landet heilt åleine. Det var veldig tøft å flykta, seier 33 år gamle Saido Mohamed Warsame til Grannar.
Med berre eitt års skulegang frå heimlandet Somalia i bagasjen og med morsmålet som einaste språk, er utfordringane mange, men den unge kvinna let seg ikkje stoppa av den grunn. Ho vil skapa seg ei framtid i Vindafjord og starta med å læra seg språket.
