Fleire Helse Fonna-tilsette smitta av covid-19

Fleire medarbeidarar ved Haugesund sjukehus har dei siste dagane fått påvist covid-19, noko som fører til omfattande smittesporing blant pasientar og tilsette. Det er helseføretaket som skriv dette i ei pressemelding måndag føremiddag.

— Førebels er det snakk om fire medarbeidarar med tilknyting til éi avdeling som er smitta. Me har framleis normal drift, men dersom fleire får påvist smitte, kan det bli ei utfordring med bemanninga, opplyser klinikkdirektør John Conrad Brandsø i Medisinsk klinikk Haugesund og Odda, i meldinga.

Det har også vore høgt sjukefråvær siste tida som følgje av andre virussjukdommar. I tillegg er éin tilsett i ambulansetenesta smitta. Også her pågår smittesporing.