Får gode råd med på kjøpet

Om få timar skal det nye året feirast med smell og lysande glitter på himmelen. Men før lunta skal tennast og rakettane skal skytast opp mot den mørke nattehimmelen kan det vera lurt å følgja nokre enkle råd for å unngå uønska hendingar. Janet Leite, som til dagleg driv Sandeid Blomster og Gaver, har lang erfaring med sal av fyrverkeri og veit kva som må til for å unngå ulykker.

— Det viktigast er bruk av briller og å halda god avstand. Dersom du brukar briller og er forsiktig, er det trygt, seier Leite og deler villig ut gode råd til alle kundane som finn vegen til det vesle utsalet midt i Sandeid sentrum.

— Alle som kjøper fyrverkeri får eit par vernebriller og ein tennstav med på kjøpet. Og fyrverkeri som ikkje går av kan returnerast, seier ho.