Fangar kvardagsminne gjennom linsa

I huset heime på garden i Vats har Sara rigga seg til med eit eige fotostudio. Her har ho alt som trengst for å fanga livets små og store augeblikk gjennom kameralinsa, enten det er bildet av eit lite nyfødt barn, ein sprudlande eitt-åring, ei vordande mor eller ein heil familie. Men aller helst likar ho å ta kameraet med utandørs, der naturen får bli ein naturleg del av motivet og der lyset og fargane skapar ei heilt spesiell stemning.

— Eg tek helst bilde ute. Det blir finast. Eg tek mange av bileta her på garden, enten ved vatnet, i skogen eller på bøen. Eg likar aller best å ta bilde på bøen, seier Sara.

Sommarhalvåret er den beste tida for fotografering og når bøen grønkast og blomane kikkar fram frå vinterdvalen har Sara det ekstra travelt.