Familiebedrift får næringspris

— Det var både overraskande og veldig kjekt å bli heidra. Me er stolte og takksame for anerkjenninga, seier dagleg leiar Knut Inge Haraldseid i Rørlegger Haraldseid AS til Vindafjord kommune si nettside.

Familiebedrifta held til i Skjold og fyller 50 år i 2025. Dei omsette for over 30,5 millionar kroner i 2024. Ifølgje eiga nettside tilbyr selskapet tenester som installasjon og service på varmeanlegg, vassboren varme, sprinkleranlegg og varmepumper.

I tillegg utfører dei røyrleggartenester for nybygg, industri, næringsmiddelindustri, oppdrettsnæring og ved oppussing av bad. Oppdragsområdet deira omfattar mellom anna Etne, Vindafjord, Sveio, Tysvær, Bokn og Haugesund.