Etterlyser fortgang i vegarbeid

Det er mange månadar sidan arbeidet med å utbetra fylkesvegen mellom Trovåg og Dommersnes starta, og framleis er ikkje arbeidet ferdigstilt. At arbeidet dryger ut har irritert innbyggjarane, og i august blei dette ein debatt på Facebook-sida Oppslagstavle for Vikebygd.

Yngve Kolltveit var ein av dei som kontakta fylkeskommunen for å høyra korleis stoda var.

— Det er jo ikkje kjekt når me ser kor tregt dette går. Då eg kontakta fylkeskommunen i august, fekk eg beskjed om at det var både ferieavvikling og ein del avklaringar som måtte sjekkast, men at dei skulle starta opp igjen i neste veke». Då neste veke kom, blei det sett opp skilt, det var nokre folk som var der å jobba eit par dagar, men så forsvann både skilt og folk igjen. Me veit ikkje kva som skjer og kor lenge me må venta, seier Kolltveit.