Etne står utan brannleiing

Det har vore ei utfordrande tid i Etne brann- og redning, spesielt etter at den nye brannordninga blei vedtatt av kommunestyret i juni 2023. I følgje eit referat frå eit møte mellom kommunalsjefane i Etne og Sauda, gjekk varabrannsjefen i sommar over i ny stilling som rådgjevar på byggesak i Etne kommune. Fredag 8. november fekk brannsjef i Etne brann- og redning (EBR) beskjed om at han blei omplassert til andre arbeidsoppgåver i Etne kommune, med oppstart måndag 18. november.

Vigleik Gutubø er verneombod i EBR. Han opplyser til Grannar at brannsjefen heilt sidan varabrannsjefen slutta i august, har bede kommuneleiinga om å få erstatta denne stillinga, noko kommunalsjef Åsmund Andersen Sekse har avvist.

Ifølgje Gutubø vil ikkje kommunalsjefen verken erstatta stillinga i år eller leggja stillinga inn i budsjettet for 2025, noko som gjer at brannsjefen er åleine i brannadministrasjonen, og han er tilsett i ei 50 prosent stilling som brannsjef. Den andre halvparten av årsverket er som rådgjevar.