Etne kommune møtte departementet: — Tok til seg alvoret i saka

— No har me snudd kvar stein i denne saka, seier Kenneth Karlsen etter det i underkant av ein time lange Teams-møtet som Etne kommune og Olje- og energidepartementet hadde fredag.

I møtet presenterte kommunedirektøren og varaordføraren mellom anna historikken i Etne kommune si handsaming av saka gjennom tre høyringsrundar, heilt frå saka kom på bordet første gong for seks år sidan.

— Me peikte på dei innspela me har gitt og spørsmåla me har stilt gjennom dei tre høyringsrundane, fortel Karlsen.

Monstermaster

Eit samrøysta kommunestyre i Etne har som kjent kravd ei ekstern utgreiing av eit alternativ med sjø- og jordkabel frå Matre i Kvinnherad rundt Bjoa og inn Ålfjorden, som eit alternativ til det mange kallar monstermaster» i ei luftlinje-trasé over Åkrafjorden, Stordalen, Litledalen, vidare opp Strypeheiane og så vidare vestover gjennom Vindafjord og over Skjoldafjorden.

Men korkje kommunen eller andre som har engasjert seg for å få Statnett og NVE til å lytte i særlig grad til jord- og sjøkabel som eit alternativ har vunne fram med sine synspunkt så langt.

Saka ligg no på bordet til olje- og energidepartementet for endeleg avgjerd. Og etter at det kom signalar frå olje- og energiminister Terje Aasland (Ap) som tyda på at det nærmar seg avgjerd, kravde Etne kommune sist veke eit hastemøte med departementet. Det fekk dei altså. Rett nok ikkje med ministeren, men med statssekretær Elisabeth Sæther (Ap).

— Tok til seg alvoret

Det var Kenneth Karlsen (Frp), i kraft av sitt verv som varaordførar, som representerte Etne kommunens politiske nivå i møtet. Dette fordi ordførar Mette Heidi Bergsvåg Ekrheim (Sp) er erklært inhabil i saka. Dette grunna hennar verv som styremedlem i Sunnhordland Kraftlag, som Vestland fylkeskommune sin representant i styret.

Karlsen seier til Grannar etter møtet fredag at han oppfatta regjeringa sine representantar i saka som lydhøyre i det digitale møtet. Om det betyr at eit sjø- og jordkabel-alternativet, eller eventuelle andre endringar på traseen, blir ein del av OED si komande avgjerd tør han ikkje meine noko om.

— Det er umogeleg for meg å spå kva dei vil lande på. Men eg er optimist, på den måten at dei tok til seg alvoret i saka, seier han.

Delte meiningar

Det har som kjent vore sterke protestar frå mange privatpersonar i Etne, spesielt mot at naturopplevingane kring Strypeheiane ved inngangen til det Haugesund Turistforening liker å kalle Gullruta» i Etnefjella, kan blir sterkt forringa. Det er mellom anna eit faktum at utsikta frå Hårlandsnepane inst i Litledalen, av mange betrakta vel så spektakulært som Trolltunga i Hardanger, blir kraftig forringa av det planlagde luftspennet.

Andre krefter, nyleg med Høgre sine ordførarkandidatar Vindafjord, Tysvær, Bokn og Haugesund, og stortingsrepresentant Terje Halleland (Frp), har i Grannar gitt uttrykk for at viktigheita av å få nett til Haugaland Næringspark er viktigare i denne saka. Dette for ikkje å gå glipp av potensielle industrietableringar med mange arbeidsplassar dei næraste åra.

Karlsen seier at statssekretæren var tydeleg på at departementet tar ei sjølvstendig og grundig vurdering av saka, seier Karlsen.

— Dei jobbar sjølvstendig

Etne sitt krav om ekstern ugreiing blei ikkje tema i møtet.

— Departementet jobbar sjølvstendig med saka. Korleis dei gjer det må vere er opp til dei, understrekar Karlsen.

— Fekk de signalisert noko kring når det kan ligge føre ei avgjerd?

— Nei. Dei poengterte at dei ikkje har noko tidsfrist. Men prosessane er i gang, seier han.

Grannar har vore i kontakt med olje- og energidepartementet fredag, men trass lovnadar frå kommunikasjonsavdelinga til departmenetet, hadde statssekretær Elisabeth Sæther ved 16-tida enno ikkje tatt kontakt med avisa.