Elevane fekk råd om sparing, gjeld og økonomisk varsemd
Inger Lise Kringlebotten Asheim er til dagleg finansrådgjevar i Sparebank 1 Sør Norge i Ølen. Med ujamne mellomrom tek ho på seg fleecegenseren som tydeleg viser at ho er med i økonomipatruljen. Då er målgruppa dei heilt unge, og opplegget er eit samarbeid med organisasjonen Ungt Entreprenørskap.
— Ei trygg og god styring av privatøkonomien, som er så viktig for livskvaliteten seinare i livet, byrjar allereie i ungdommen. Alle skal få lov til å prøva og feila litt, men nokre vanar kan bli dyrekjøpte erfaringar som blir vanskelege å snu seinare. Derfor er me så opptatt av å snakka med ungdommen om privatøkonomi, seier Asheim.
Ved Skjold skule var det 14- og 15-åringar ho traff, med andre ord ungdomar som kan bli konfirmerte seinare i år. Aleksander Brekke viste både interesse for og kunnskap om økonomi, og kunne godt tenkja seg meir tips om fondsforvalting og porteføljehandtering.
