Eit langt liv bak vevstolen

I andre etasje på huset sitt i Sandeid har Gunhild Larsen si eiga vevstove. Her har ho plass til to vevstolar, garn og anna utstyr ho treng for å dyrka sin store lidenskap, og når arbeidslysten kjem sigande, set ho seg ned ved veven og let skyttelen gå.

— Eg starta å veve for 40 år sidan, seier Gunhild og dreg fram vevkrakken.

Ein knallraud juleløpar med gulltrådar er hennar neste prosjekt og sjølv om ho har hatt ein liten pause frå vevinga i sprengkulda dei siste dagane, er ho godt i gang med arbeidet.